Time “समय” ,  दिलो में तुम अपनी बेताबियाँ लेके चल रहे हो तो जिंदा हो तुम…..

‘लग्‍नापूर्वी मी मस्तपैकी फिरायला जायचो, वाट्टेल तिथे ट्रेकिंग करायचो. लग्‍नानंतर मात्र नोकरी आणि कुटुंब एवढंच माझं वलय. यातून आता वेळच मिळत नाहीये.’
‘हो, खरं तर मला आवडतं चित्र काढायला; पण नवरा, मुले, सासू-सासरे यांच्‍या गराड्यात वेळच नसतो छंद जोपासण्यासाठी.’
‘कॉलेजात असताना एक काळ गाजवलाय. माझ्या गाण्याचे हजारो चाहते होते. काहीजण आजही ओळखतात मला…’

यांसारखे असंख्य संवाद आपल्‍या आजूबाजूला वावरणाऱ्यांच्‍या तोंडून सहजपणे ऐकायला मिळतात. आयुष्याच्‍या एका टप्‍प्‍यावर नोकरी, लग्‍न, मुले आणि संसाररूपी भवसागरात जीवनात ठरविलेली काही गणिते हळूहळू कशी बदलतात हे बराच काळ जाईपर्यंत कळतदेखील नाही. मात्र, यामध्ये आपण स्‍वतःलाही हरवून बसतो. काहींनी आयुष्यात कधीकाळी जोपासलेली सर्वोत्‍कृष्ट गायक, चित्रकार, धावपटू, सायकलपटू, कवी, लेखक आदी बिरुदे कालौघात विरून जातात. इतिहासाच्‍या कोणत्‍याच पानावर या व्‍यक्‍तींची कधीही दखल घेतली जात नाही. कारण, अशा व्यक्ती केवळ वेळेच्‍या नियोजनाअभावी पावसाच्‍या सरीप्रमाणे पडद्याआड जातात… अगदी नकळतपणे. हे होऊ द्यायचे नसेल तर वय, पद, प्रतिष्ठा, जबाबदाऱ्या या सर्वांचे भान ठेवून वेळेचे नियोजन केल्‍यास सर्वकाही स्वतःचे छंद जिवंत ठेवता येऊ शकतात. त्‍यासाठी आवश्यकता आहे ती इच्‍छाशक्‍तीची. आणि हो, हे सर्वकाही सहज शक्‍यही आहे.

२६ ऑगस्‍ट २०१८ रोजी मी फ्रान्‍सच्‍या आयर्नमॅन स्‍पर्धेत सहभाग घेऊन वयाच्‍या ५१व्‍या वर्षी अवघ्या १५ तास १३ मिनिटात स्‍पर्धा पूर्ण केली. ही स्‍पर्धा पूर्ण करण्याचे संपूर्ण श्रेय मेडिटेशन आणि व्‍हिज्‍युअलायझेशनला जाते. मी पहाटे तीनला उठून मेडिटेशन करायचो. ज्‍यामुळे माझे मन आणि मेंदू बळकट झाले. त्यानंतर व्‍हिज्‍युअलायझेशनद्वारे आयर्नमॅनची तयारी करीत असे. उगवत्‍या सूर्याच्‍या साक्षीने रनिंग, वॉकिंग आणि सायकलिंग अशी तयारी करायचो. आयर्नमॅन स्‍पर्धेची तयारी अगोदर मन आणि मेंदूच्या परिपक्वतेतून झाली होती. यातूनच आत्मविश्वास निर्माण होऊन यशोशिखर गाठता आले. अवघ्या १५ तास १३ मिनिटात ३.८ किलोमीटर पोहणे, १८०.२ किलोमीटर सायकलिंग आणि ४२.२ किलोमीटर धावून ही स्‍पर्धा पूर्ण केली. त्‍यामुळेच मला वाटते, की विजय मिळविण्यासाठी मनात दृढनिश्चय करणे अत्‍यंत महत्त्वाचे असते. त्‍यानंतर जिंकण्यासाठी तुम्‍हाला ५० टक्‍के प्रयत्‍न करावे लागतात. तुमचे मन बलशाली करण्यात यशस्वी झालात तर तुम्‍हाला तुमच्‍या ध्येयापासून कोणीही रोखू शकत नाही. एकंदरीत, डिप्रेशन आणि एन्‍झायटी यांसारखे मानसिक आजार तुमच्‍या जवळ फिरकणारदेखील नाहीत. तुम्‍ही तुमच्‍या करिअरमध्ये मोठी उंची गाठू शकता.